香港新浪網 MySinaBlog
« 上一篇 | 下一篇 »
蘆葦 | 10th Dec 2007, 01:47 AM | 一刻無聊 | (446 Reads)
Picture

「唔好食咁多酸辣嘢了,妳又話成日胃痛。」

 

「那好味嘛,係啦,今朝都胃痛。」

 

「那快去睇大夫啦。」

 

「最驚睇大夫!唔睇。」

 

「我最驚既只係大夫收得貴。」

 

「唔睇啦,都無事啦。」

 

「咁有無食藥呀?」

 

「唔食,最憎食藥。」

 

「…」無言。

 

「人地病你都唔問多句關心下人!」

 

「妳病,咪要你睇大夫,妳唔睇,咪勸下你食下藥,抖多啲,你又唔食唔抖,係了,我諗到我要睇大夫了。」

 

「你又病?」

 

「睇心理醫生,問下佢係妳有病定我有病…」

 

「你無得醫架啦!係啦,你話我學色士風好唔好。」

 

「點解要吹野?」

 

「鐘意囉,我聽人吹吹得好好聽。」

 

「係呀,係人地吹得好好聽。」

「所以我咪去學囉。一陣去XX睇下啲色士風先。」

「…你上次咪學了咩咩舞…又買件衫話去跳舞,轉過頭又話要學瑜伽,又去買張毯,跟住妳好似好有天份,學了一兩個月便『滿師』,唔使學或者無再學囉。」

 

「咁人地想學嘢嘛,妳又唔俾人學電單車。」

 

「點解要學電單車?」

 

「好威風呀,呼呼呼咁。」

 

「好鬼死威風架,尤其同架貨車一撞,『砰』一聲,架貨車乜嘢都無架,個司機唔知發生咩事忝,妳就好威風,好型咁,成個特技咁,一飛沖天,凌空翻身咁整個人生最後的特技表演囉。」

 

「咁你俾唔俾我學色士風呀?」

 

「唉…又幾千蚊買件嘢吹,吹兩吹,又唔吹。吹脹居多,不如我教你吹口哨,起碼個咀唔使幾千蚊去買。」

 

「……唔理你。」

 

時間:下午七時四十五分、地點:銅鑼灣。

 

「搭咩車返屋企?」

 

「小巴吧。」

 

「邊度?」

 

「鵝頸橋個邊。」

 

「哦。」

 

「你仲乜行個邊?」

 

「你話鵝頸橋嘛。」

 

「妳行緊去『鵝尾橋』。」

 

「不是這邊嗎?哦,咁唔認得嘛,呢度條條街都差唔多樣,邊度認到。」

 

「非正式統計,你都嚟銅鑼灣幾百次,即使條條街真係孖生咁個樣,都應該認到掛。」

 

「今次我地呢邊行嚟嘛,同上次唔同,邊度認到。」

 

「有趣,下次我行係你右面,你都可能認唔到我。」

 

「係呀,你試下囉。痴線。」

 

時間:下午八時三十分、地點:家。

 

我手執的一、二袋東西終可放下,但屋中還是漆黑一片。

 

「仲乜仲唔開燈?」

 

「生日快樂!今天可是你生日呢!」她拿了一個生日蛋糕出來。

 

「唔使插那麼多蠟燭掛…」

 

「開心嘛?」

 

「開心。」

 

「你個樣都無乜表情。都唔唔知你係乜真係開心。」

 

「咁我係咁個樣,無計。」

 

「咁同你慶祝咗生日,今年你一定要同我去聖誕倒數呀!」

 

「早幾年去了吧,成班人堆係個十字路口,郁都郁唔到,係到學數一、二、三,好無聊。」

 

「咁呢啲叫氣氛呀!」

 

「咩氣氛我唔知,諗起個啲人山人海,係個馬路企係度進退不得幾個鐘、要走番出來返屋止又個幾兩個鐘既經歷,真係諗嚟諗去都唔知為咩。」

 

「咁你去唔去呀倒數呀!」

「實不相瞞、小弟數數字倒有一手,唔使去街同幾百、幾千人學點樣數由10數到1,我宜家都可以即刻數俾你聽,10、9、8、…」

「咁你咩節日都唔慶祝!人地唔開心。」

 

「節日係乜?係開心事,咁要慶祝,為乜?為開心。調番轉頭,咁唔慶祝就唔開心?咁係咪好似有啲本末倒置?」

 

「咁你乜都唔慶祝,乜都無所謂,點先知開心,都唔知你諗乜架!」

 

「我生日、過年過聖誕,都開心喎,如果有假放就更開心啦,只要一起渡過就是最重要了吧。」

 

平凡的一天過去了。

 (以上內容純屬虛構,如有雷同實屬巧合。)

================================

故事說完,這是平凡的一天,這是平凡的故事。

 

我們都不甘平凡,想突出、想新鮮;想刺激、想搞搞新意思。

 

心思太多,花式各樣,眼花撩亂,倒頭來反而搞不清楚快樂的本質。

 

假期不一定要旅行,旅行不一定要早早起來,安排一個接一個的行程。

 

節日不一定要慶祝,節日不一定要匆匆往來,追趕一場又一場的聚會。

 

有時候,一本書,一首音樂,呆呆的待在家裏,身邊有你最親近的人相伴,已是難得消遙,活得精彩。

 

聖誕節佳節將致,在此祝各位聖誕快樂,身體健康吧。

[1]

NICE~


[引用] | 作者 路人甲 | 11th Feb 2008 13:23 PM | [舉報垃圾留言]